قيد حب

– ليلي!! انتي بتعملي ايه هنا

قالها رحيم باستغراب عندما دخل الشركة وتفاجأ بزوجته ليلي التي ردّت عليه ببرود:

– بشتغل

– نعمممم

لتجيبه بنفس البرود:

– بشتغل. أظن واضح

– ومين اللي سمحلك تشتغلي

نظرت إليه بتحدٍّ وقالت:

– انا سمحت لنفسي

قال رحيم بسخرية:

– يااشيخة

نظرت إليه بضيق وقالت:

– عن اذنك علشان عندي شغل

وقبل أن تتحرّك، قاطعها بصوت هادئ لكن مريب:

– حالا ترجعي البيت

نظرت إليه، وكادت تعترض:

ليقاطعها بنبرة حادة:

– حالا. سمعتي

لكن ردّت ليلي بشجاعة:

– لا مسمعتش يارحيم. ومش هرجع

حاول رحيم التماسك وقال بهدوء:

– طب انا هعتبر اني مسمعتش حاجة… ويلا قدامي علي البيت

هزّت رأسها برفض:

– لا طبعا. انا مش هروح

ثم أضافت بسخرية:

– وبعدين انت مالك بيا

بدأ الغضب يتسلّل إلى ملامحه وقال:

– هو ايه اللي مالي بيكي.. انتي مراتي

لترد بسخرية لاذعة:

– والله. مراتك.. طب والله كويس انك عارف اني مراتك

تجمّعت الدموع في عينيها، وتابعت بصوت مهتز:

– ولما انا مراتك. روحت ليه اتجوزت عليا

ليقول رحيم بهدوء:

– اسمها رجعت مراتي يا ليلي. ياسمين كانت مراتي قبلك

هزّت ليلي رأسها عدة مرات بمرارة وقالت:

– عندك حق..

ثم نظرت إليه واكملت بألم مخفي:

– طيب خليك بقا في حبيبة القلب اللي رجعتها وعيش حياتك. عااوز مني انا ايه. طلقني وسيبني اشوف حياتي انا كمان

ليقول رحيم باستفهام:

– تشوفي حياتك ازاي يعني؟!

أجابته بثبات:

– اشوف حياتي مع اللي يحبني بجد. اظن حقي

ما إن أنهت عبارتها حتى غضب وقال:

– وانتي عاوزة تطلقي علشان تروحي تتجوزي

ردّت بلا تردد:

– حقي

مسح رحيم وجهه محاولًا الهدوء، وقال:

– ليلي متهديش البيت. ارجعي.. انا مقدرش اخسرك. ارجعي ياليلي

صرخت فيه بألم:

– ازااي.. ازاي عاوزني ارجع وحبيبة القلب خلاص بقت معاك وفي ح.ضنك.. طب انا فين مكاني

ظهر الضعف في صوتها وهي تكمل:

– انا ماليش مكان في وسطكم.. مراتك وحبيبتك رجعتلك زي مابتقول. يبقي انا اقطع عليكم ليه

تنهدت بوجع ثم أضافت:

– خليني انا كمان اروح للي يقدرني ويحبني

ليقول رحيم بغضب:

– انا مش عاوزك تنطقي الكلمة دي تاني.. فاهمة

أجابته بتحدٍّ:

– لا مش فاهمه

ثم قالت بقوة:

– طلقني يارحيم

لكن رحيم ردّ بحسم:

– بس انا مش هطلقك

اشتعل غضبها، وكادت ترد إلا أنه أمسك بيدها وقال بهدوء يناقض غضبه:

– انا مقدرش استغني عنك. ارجعي ياليلي